بلوچی سازءُ زیمل دیم پہ زوال انت

بلوچی سازءُ زیمل دیم پہ زوال انت

عبدالوهاب ایران نژاد
هرقومی نوکیں ادب بہ بیت یا کہ ساز ءُ زیمل آئی ءِ بنپد کلاسیکل انت بلوچی نوکیں موسیقی بنپد هم باید انت بلوچی کلاسیکل موسیقی بہ بیت . بلے بژنی گپ ایش انت کہ مئے نوکیں سازءُ زیمل بلوچی کوهنیں ءُ کلاسیکل موسیقی بنیاد ءِ سرءَ ایر نہ انت. اے مزنیں تاوان ءَ بازیں سوبے هست. یکے اش انت کہ مئے کلاسیکل ءِ جنوک ئُ گشوکاں چوشیں علم ءُ زانتے نہ بیتگ کہ موسیقی میراثءَ آیوکیں نسلاں هیل بہ دینت.

دومی گپ ایش انت کہ مئے نوکیں موسیقی چہ کراچی ءِ شهرءَ بنگیج بیتگ کہ سک چہ هندی موسیقی ءَ اثر مندانت بلوچی نوکیں دورءِ نامدارتریں زیمل زانتاں ماں همے تهرءَ بلوچی نوکیں موسیقی ءِ بنپد ایر کتگ اے نسلءَ وت چہ هندی کلاسیک ءُ نیم کلاسیک موسیقی ءِ استادان سازءُ زیمل هیل کتگ اے نسل ءَ هندی موسیقی هم پہ ردءُ رهبند ءُ علم موسیقی نوکیں رهبنداں درنہ برتگ پہ درور نہ هدامرزی ستارءُ نے کہ شفیع ءُ نے کہ غلام رسول دینارزهی ءَ نُت کہ نوکیں موسیقی یادگرگ ءُ یاددیگ مزن تریں وسیلہ انت نزانتگ. اے استاداں اے دورءَ کہ موسیقی ءِ علم ءَ باز دیمروی کتگ انگت هما قدیمی ءِ گوش کنگ ءِ رهبند ءَ موسیقی هیل کرتگ یک دگہ دردی گپے ایش انت کہ مئے نوکیں نسل ءُ نوکیں دورءِ موسیقیءِ داوادار هچ کسءَ یک بلوچی سرجمیں زهیروکے کہ مئے سازءُ زیملءِ ارواه انت نوکیں ءُ یا بلوچی کوهنیں سازانی سرءَ جت نہ کنت اگاں چہ اے واجهاں جست بکن ۓ کہ بلوچی سازءُ زیملءِ میراث چی انت گڑا بڈءُ بگلے زهیروک ردکن انت . بلے زهیروکانی جنگءِ وهدءَ کمیت اش لنگ انت. یاکہ بلوچی سازءُ زیمل ءِ شاهگانی ءِ کسوءَ گوں بلوچی زیمل بازیں سازانی کسوءَ آسر کن انت اے گپ سهرا انت کہ سازءِ بازی موسیقی ءِ کوهنی یاکہ اصالت ءِ شونداری ءَ نہ کنت مروچی مئے سرودءُ بینجو هر غیر بلوچ ازمگرے جت کنت باید انت کہ مئے سازگر ، گوشنده یا کہ زیمل ساچ (موسیقار) گوں اے بلوچی سازاں بلوچی موسیقی بجن انت مروچی مئے زیمل دردناکیں کسو ایش انت کہ چہ وتی کوهنیں و کلاسیکل میراث ءَ سرسستگ ءُ گسر انت انگت مئے نوکیں موسیقی ءِ سرخیل چو شفیع ، ستارءُ غلام رسول دینارزهی زیمل ءُ ترز بلوچی کوهنیں موسیقی بوءَ کن انت یا کہ اے مرداں پہ هندی کلاسیکل موسیقی هیل کنگ ءَ مزنیں جهدءُ جفاے کش اتگ بلے بلوچی هنوگیں نسل ءِ گوشنده ءُ سازگراں چٹ بلوچی موسیقی نزان انت مروچی بلوچی موسیقی هما جا سربیتگ کہ یک هدوناکیں ورناے وتی گوشنده، ترزجوڑ کنوک وت ءَ بازارشنگ کنوک درست وت انت یکے چارکران زربیت کراچی غیر بلوچیں زیمل زانت ءُ اسٹوڈیو صاحباں آئی ءِ کیسٹ ءَ هپتگے توک ءَ درکن انت اشانی وت گڑءُ گیگانیں موسیقی نہ بلوچی انت ءُ نے کہ دگہ همساهگیں قومانی موسیقس انت یک سرابرائیں ءُ بے بیهـ ءُ بنیادیں موسیقی ے کہ مردم ایشیءِ سرءَ نہ کندات ءُ نہ کہ گریت کنت بلوچی کلاسیکل موسیقی وتی گڈی ساه ءَ گوں هدامرزی غلام قادر ءُ ملاکمالان کشک ءَ انت بلے نہ اے دوئیں بامرداں چوشیں علمی زانت ءُ ازمے هست ات کہ بلوچی موسیقی ءِ میراث ءَ پہ اے دگہ نسلاں سر بکن انت ءُ نے مئے نوکیں موسیقی سرخیلاں چوشیں هب ءُ زانتکاری ے هست ات کہ کوهنیں موسیقی ءِ میراث چہ کلاسیکل گوشوک ءُ جنوکاں هیل بکن انت پمیش ءَ بلوچی کوهنیں موسیقی ماں دنزءُ مجاں بیگواه انت ءُ مئے نوکیں موسیقی ترپلءُ ماں رنگراهاں سرسر جنگ انت اے موسیقی عمر بازنہ انت اے هم چو مئے کلاسیکل ءَ کل ءُ گور بیت. لهتے گیگان گروک انگت مئے کلاسیکل ءِ رندءَ کپتگ انت ءُ وتی منّ ءَ وت ءَ کلاسیکل ءِ میراث دار گوش انت بلے اے بیچارگ انگت نزان انت کہ بلوچی کلاسیکل موسیقی دَور دیرانت کٹ اتگ چی ءَ کہ مئے هنوگیں چاگرد ءِ مردماں کلاسیکل موسیقیءُ کوهنیں شاعری گوشدارگ ءِ وهد نیست اے رمب ءِ مردم انگت ملاکمالان ، هدامرزی غلام قادر ءُ ملا موسی ءِ گیگان ءَ گپت نکن انت اے وت گڑ ءُ بے روتگیں کلاسیکل کہ انگت نوکیں و کلاسیکل موسیقی فرق ءُ پیر ءَ نزانت ءُ کلاسیکل پنجگ ءِ ریتم ءِ جاگہ ءَ ڈهل آوارکنت کجامئے کوهنیں موسیقی ایرگوات ءَ گوست کنت یک رندے ایران نامداریں آهنگ سازے « ای ایران ای مرزپرگهر» سوت ءِ ترزۓ جوڑ کتگ یک جاهے بلوچی سازءُ زیمل بابت ءَ پہ بژن ءُ اپسوز گوشتگ ات کہ بلوچی اے سازگر ءُ گوشنده کہ رسمی دیوان ءُ مراگهاں بهر زیرانت اے انگت وتی سازءُ آوازءِ کوک (سُر) کنگ ءَ نزان انت ءُ اے انگت موسیقی هفتیں سرجمیں سُراں جت نہ کن انت ءُ یک کیوے پدماں پد تکرار کن انت اے مردءَ بلوچی موسیقی پژم هنچو جت ءُ شِتت انت کہ گوشت ۓ کہ من بلوچی موسیقی ءَ منّ ات نہ کناں ءُ اگاں نہ بزاں تنے وهدی من نہ اشکتگ یک دگہ المیه ے گوں بلوچی موسیقی ءَ اش انت کہ مئے هنوگیں ازمگراں بلوچی موسیقی وتی لاپ جوڑ کتگ من یک مشهوریں گوشندهے یک برے مان ترینت ءُ گوشت فلانی شما پرچے بلوچی موسیقی چو کم شرپ کتگ کہ مئے موسیقی پیشی ترزءُ گوشتگیں چیزانی گیگانءَ شری سرءَ گپت نہ کن ات؟ اے مردءَ یک حقیں پسوۓ منءَ دات ءُ گوشت ۓ کہ فلانی بلوچی موسیقی مئے انت . اگاں نہ ما وت شرزانیں کہ ماهچ نزانیں اے ڈولیں ازمگرانی دگہ تاوانے اش انت کہ هما ازمگر کہ پہ هب ءُ واهگ ازم ءِ پڑءَ کاینت دلپروش بنت اے ٹک ءِ ازمگر هروهد دیوانے نندانت پیسر ءَ وتی ڈنی ءُ ملکی سفرانی باروءَ گپ جن انت بزاں گوں گنگیں زبانے همے گوش انت کہ مئے ازم اگاں شمارا دوست نہ بیت شمئے وتی میار انت اگاں نہ گڑا چو من اینچو ملک ءُ هلکہ گولتگ ءُ یا مئے لهتے ازمگر لهتے دیواناں چینی ءُ ایرانی ءُ نزاناں کجام ملک ءِ ترزءُ سوتانی جنوک وت پیش دارانت نی اے وڑیں ازمگرانی راه ءَ کئے بُرّایت کہ چہ وتی موسیقی سرریچ ءُ دگہ قومانی موسیقیءِ جهانءَ سربیتگ انت قول سید « جهندم چہ بادگیرءَ کاپَرشُت» بلوچی ءَ زیمل ءَ هنچیں بامردے کہ سید هاشمی ءَ پکارات کہ نوکیں موسیقی دامن ءَ گوں کوهنیں میراث ءَ گرنچ بدات اگاں نہ بلوچی زیمل ءِ بانور گوں اے ماتوئی مهراں نہ سهمبه ایت ـ (هلاس)